Millət vəkili Vahid Əhmədov kəndlilərin öz məhsullarını bazara çıxarıb rahat sata bilmələri üçün təkliflər irəli sürüb. Bu barədə ShimalNews 9 iyul tarixində Bakupost.az-a istinadən məlumat verir.
“Regionlarda məhsulun istehsalı, satışı, emalı prosesi əsas problemlərdəndir. Şimal zonasında bir konserv yeri qalıb. Əvvəl 3-4 ədəd idi. Hamısını özəlləşdirib başqa adla istifadə edirlər. Ona görə də bölgələrdə emal müəssisələrinin tikilməsinə çox böyük ehtiyac var. İnsanlar məhsulunu ora verib vəsaitlərini alırlar. Bu yaxınlarda Quba-Xaçmaz zonasında kiçik emal müəssisələrinin tikilməsi üçün təkliflər irəli sürdüm. Həmin emal müəssisələri məhsulları qəbul edib istehsal edir. Bu müəssisələrin tikilməsi vacibdir. Çünki Azərbaycanda bu cür yerlər kifayət qədər deyil”, - deyə V.Əhmədov söyləyib.
Deputat bildirib ki, çıxış yolu kimi Rəqabət Məcəlləsinin qəbul olunması üzərində iş gedir. Bununla inhisarçılıq (monopoliya) tam ləğv olunmasa da, tədricən azala bilər. Bu həm də qiymətlərə təsir edəcək.
