2026-cı ilin yanvar-sentyabr aylarında Şəki Xan sarayını 178 minə yaxın yerli və xarici ziyarətçi gəzib.
Shimal.News xəbər verir ki, bu barədə Dövlət Turizm Agentliyinin Qoruqların İdarəetmə Mərkəzinin İdarə Heyətinin sədri Murad Ağabəyli jurnalistlərə açıqlamasında bildirib.
Onun sözlərinə görə, hesabat dövründə sarayı ziyarət edənlərin 128 min nəfəri bilet alıb, 50 minə yaxın şəxs isə ödənişsiz giriş imkanından yararlanıb.
Bilet alaraq saraya daxil olanların 45 faizini xarici turistlər təşkil edib.
Murad Ağabəyli Şəkidə tarixi-mədəni irsin qorunması və turizm infrastrukturunun inkişafı istiqamətində görülən işlərdən də danışıb.
O bildirib ki, şəhərdə şəbəkə emalatxanasının bərpası başa çatdırılıb, dulusçuluq emalatxanası yaradılıb. Bundan başqa, Kiş kəndindəki tarixi məsciddə və Şəkinin qədim hamamlarında bərpa işləri davam etdirilir.
Qeyd edək ki, Şəki Xan sarayı şəhərin əsas tarixi-memarlıq abidələrindən biridir. Xan sarayı ilə birlikdə Şəkinin tarixi mərkəzi 2019-cu ildə UNESCO-nun Ümumdünya İrs Siyahısına daxil edilib.
