Qubada və Qusarda kənd təsərrüfatı məhsullarının emalı üzrə müəssisələrin qurulması bölgələrdə yeni iş yerlərinin açılmasına və əhalinin paytaxta axınının azalmasına kömək edə bilər.
İstiqlalçı deputat, iqtisadçı Vahid Əhmədov bu barədə müsahibəsində danışıb.
O bildirib ki, Azərbaycanın 14 iqtisadi rayonunun hər biri üçün konkret dövlət proqramı hazırlanmalı, həmin sənədlərdə hansı bölgədə, nə vaxt və nə qədər iş yerinin yaradılacağı dəqiq göstərilməlidir.
Vahid Əhmədovun sözlərinə görə, kənd təsərrüfatı məhsulları istehsal olunan rayonlarda emal müəssisələrinin yaradılması vacibdir. Hazırda bəzi məhsullar emal edilmədən, yarımfabrikat şəklində xaricə satılır.
İqtisadçı Sumqayıtda yaradılan sənaye zonasını nümunə göstərərək bu cür müəssisələrin bir hissəsinin Quba, Qusar və digər rayonlarda da qurulmasının mümkün olduğunu qeyd edib. O, həmçinin Cəbrayıl, Füzuli və Ağdamda sənaye zonalarının yaradılmasının əhəmiyyətini vurğulayıb.
Vahid Əhmədovun fikrincə, əsas məqsəd insanların yaşadıqları bölgələrdə işləməsi üçün şərait yaratmaq və Bakıya axını azaltmaqdır.
Paytaxtın köçürülməsi məsələsinə də münasibət bildirən deputat bunun tərəfdarı olmadığını deyib. O hesab edir ki, Bakıdakı müəyyən idarəetmə orqanlarını saxlamaqla digər dövlət qurumlarını regionlara köçürmək mümkündür.
Mənbə: Globalinfo.az
