FHN-in sabiq rəis müavini, general-mayor Raul Zeynalovun zərərçəkmiş kimi tanındığı cinayət işi üzrə Ayaz Bayramov xüsusilə külli miqdarda dələduzluqda təqsirli bilinib.
Bakı Hərbi Məhkəməsində hakim Zaur Hacıyevin sədrliyi ilə keçirilən prosesdə hökm oxunub. Məhkəmənin qərarı ilə Ayaz Bayramov 10 il 6 ay müddətinə azadlıqdan məhrum edilib.
İttihama əsasən, FHN-də kapitan rütbəsində xidmət etmiş Ayaz Bayramov Raul Zeynalovla şabalıd ticarəti aparıb. Onlar Qəbələ, Balakən və Zaqataladan Bakıya şabalıd gətirərək təxminən iki il bu sahədə fəaliyyət göstəriblər.
İstintaqın versiyasına görə, ticarət uğursuzluqla nəticələndikdən sonra Zeynalov Bayramovdan şikayət edib və kapitanın onun 1 milyon manatını dələduzluq yolu ilə ələ keçirdiyini bildirib. Sonradan daha iki FHN zabitinin də bu alverə qoşulduğu və aldadıldıqları iddia olunub.
Ayaz Bayramov isə ittihamları qəbul etməyib. O, məhkəmədə və istintaq təcridxanasından redaksiyamıza göndərdiyi məktubda Zeynalovun iddialarını rədd edib. Bayramovun sözlərinə görə, general ona pulları faizlə verib və vəsaiti artıqlaması ilə geri alıb. O, həmçinin həbsinin Zeynalovun sifarişi ilə həyata keçirildiyini iddia edib.
Məhkəmədə Raul Zeynalov iki dəfə dindirilib, tərəflərin üzləşməsi qarşılıqlı ittihamlarla müşayiət olunub.
Məhkəmənin gəldiyi nəticəyə görə, Bayramova qarşı irəli sürülən ittihamlar sübutlarla və şahid ifadələri ilə təsdiqlənib. Hökm çıxarılanadək zərərçəkmişlərə dəymiş ziyanın ödənilmədiyi və tərəflər arasında barışığın olmadığı bildirilib.
Qeyd edək ki, hökm hakim Zaur Hacıyevin Bakı Hərbi Məhkəməsindəki fəaliyyətinin son qərarı olub. O, hazırda Bakı Ağır Cinayətlər Məhkəməsinin hakimidir. Mənbə: Qafqazinfo.az
