Rejissor Nurlan Həsənlinin "Köçəri" adlı tammetrajlı sənədli filmi Xınalıqdan olan ata və oğulun həyatını, köçəri təsərrüfat ənənələrini və bu irsin gələcəyini əks etdirir.
Film Azərbaycan Respublikası Kino Agentliyinin dəstəyi ilə çəkilir. Ekran əsərində çoban ailəsinin Hacıqabuldan Qubanın kəndlərindəki yaylaqlara qədər 15 gün davam edən köçü lentə alınıb.
Nurlan Həsənlinin sözlərinə görə, filmin əsas xəttini oğulun məktəbi yarımçıq qoyaraq atasının təsərrüfatını davam etdirmək istəyi ilə atanın onun təhsilini davam etdirməsini arzulaması arasındakı ziddiyyət təşkil edir. Ekran əsərində Xınalıq kəndinin dili, mədəni irsi, yaylaq-qışlaq ənənələri və köç yolları boyunca yerləşən tarixi-mədəni abidələr də təqdim olunur.
Rejissor bildirib ki, mart ayında qışlaq həyatı və Novruz adət-ənənələri, avqustda isə yaylaqda görülən işlər çəkilib. Növbəti mərhələdə yaylaqdan qışlağa köçün lentə alınması planlaşdırılır. Filmin gələn ilin aprelində təhvil verilməsi, premyerasının isə ilk növbədə beynəlxalq festivallardan birində keçirilməsi nəzərdə tutulur.
Nurlan Həsənli hazırda daha bir tammetrajlı sənədli film üzərində çalışır. "Həvəskar fotoqrafın ailəvi portreti" adlanan ekran əsəri post-prodakşn mərhələsindədir. Rejissorun şəxsi hekayəsinə əsaslanan film ailə üzvlərinin bir bədii filmin çəkilişində iştirakını və onların şəxsi həyat hekayələrini əhatə edir. Layihə inkişaf və post-prodakşn mərhələlərində Amsterdam Beynəlxalq Sənədli Film Festivalı (IDFA) və "Əl-Cəzirə" sənədli film kanalının dəstəyi də daxil olmaqla bir sıra dəstəklər qazanıb.
"Köçəri" filminin yaradıcı heyətinə ssenari müəllifi və rejissor Nurlan Həsənli, prodüser Emil Nəcəfov, kreativ prodüser Türkan Hüseyn, təsvir rejissoru İman İmanov, ikinci operator Əli Rza, səs rejissoru Ramal Rüstəm, montaj rejissoru Asif İsgəndərli, icraçı prodüser Ruhin Mirzəyev və xətt prodüseri Fariz Muradxanlı daxildir.
Mənbə: Azərtac
