Kənd Təsərrüfatı Nazirliyi "Fermerin Rəqəmsal Dostu" layihəsi çərçivəsində könüllülərin qəbulunu davam etdirir.
Shimal.news xəbər verir ki, layihəyə Şəki, Quba, Qusar, Zaqatala, Şamaxı, Ağsu, Qəbələ, İsmayıllı, Oğuz, Xaçmaz və Qax rayonlarından da könüllülər cəlb olunacaq.
Layihənin əsas məqsədi fermerlərə və digər vətəndaşlara Elektron Kənd Təsərrüfatı İnformasiya Sistemindən (EKTİS) istifadə zamanı kömək göstərməkdir. Könüllülər fermerlərə elektron bəyanetmə prosesində və rəqəmsal xidmətlərdən istifadədə dəstək olacaqlar.
Kimlər müraciət edə bilər?
Namizədlərin şəxsi noutbuk və ya planşetinin olması əsas şərtdir. Bundan başqa, onlar kompüterdən, internetdən və onlayn platformalardan sərbəst istifadə etməyi bacarmalı, ünsiyyətcil, məsuliyyətli olmalı və şəxsi məlumatların məxfiliyinə riayət etməlidirlər.
Seçilmiş könüllülər üçün oktyabrın 22-dən 30-dək onlayn təlimlərin keçirilməsi planlaşdırılır. Təlimlərdə iştirakçılara EKTİS platforması, elektron bəyanetmə prosesi, fermerlərlə ünsiyyət qaydaları və məlumatların qorunması barədə biliklər veriləcək.
Layihədə iştirak könüllülərə praktiki təcrübə qazanmaq, rəqəmsal kənd təsərrüfatı xidmətlərini öyrənmək və yaşadıqları bölgədə fermerlərə yardım etmək imkanı yaradacaq. İştirakçılara sertifikat da təqdim olunacaq.
Qeydiyyat üçün son tarix 20 oktyabr 2026-cı il, saat 18:00-dır.
Müraciət etmək istəyənlər "elektron qeydiyyat formasını" (https://forms.gle/ToUEBd9eXDbogiLy8) doldura bilərlər.
