1-ci Liqanın 5-ci turu çərçivəsində "Səbail"in qonağı olan "Zaqatala" 84-cü dəqiqədə qol buraxaraq 0:1 hesabı ilə məğlub olub. Bölgə təmsilçisinin baş məşqçisi Rüstəm Məmmədovla əlaqə saxlayıb yenilgini şərh etməsini istənilib.
Fanat.az-ın məlumatına görə, onun açıqlaması belə olub:
"Artıq ikinci oyundur ki, 80-ci dəqiqədən sonra qol buraxırıq. Həm "Baku Sportninq"lə, həm də "Səbail"lə matçda belə oldu. Məncə, çox yaxşı oyun göstərdik, yaxşı mübarizə apardıq, yaxşı qol epizodları yaratdıq. Uşaqlar bütün tapşırıqları düzgün şəkildə yerinə yetirdilər. Cəmi bir səhv buraxdıq, o da qolla nəticələndi. Bu da bir təcrübədir. Səhvləri təkrarlamamaq üçün daha çox calışmalıyıq.
Qalibiyyət üçün catışmayan qol vurmamağımızdır. Qol vura bilmiriksə, qələbə qazanmaq bir az çətin məsələdir. Rəqibin qol epizodları çox az oldu. Bəlkə də bir təhlükəli vəziyyət yaratdılar ki, o da qolla nəticələndi. Yəni "Səbail"in hücumlarının qarşısına ala bilirdik. Həm də çox gözəl hücumlara cıxır, yaxşı qol epizodları yaradırdıq. Bir qədər bəxtimiz gətirmədi, amma oyunumuzdan razıyam. Bəlkə də bu mövsüm ən yaxşı oyunumuzu göstərdik. İstənilən halda, bizim görmək istədiyimiz maksimum bu deyil. Yəni bundan artığını gözləyirik. Daha artığına nail olmaq üçün daha çox calışıb daha yaxşı gedişlər etməliyik. Yavaş-yavaş komanda öz oyununu tapır. Artıq 5 çempionat matçına çıxmışıq. İndi xətlərarası əlaqələr daha yaxşı səviyyədədir. Uşaqlar meydanda bir-birlərini anlayırlar. Nə istədiyimizi bilirik. Ümid edirəm ki, növbəti oyunlarda çatışmazlıqları aradan qaldırmaq işinin öhdəsindən gələcəyik".
