Zaqatala uzun illərdir Azərbaycanın cüdo mərkəzlərindən biri kimi tanınır. Bu gün rayonda yüzlərlə yeniyetmənin seçdiyi idman növlərindən biri məhz cüdodur.
Shimal.News xəbər verir ki, AZƏRTAC-ın "Bölgələrdə idman" layihəsi çərçivəsində hazırladığı reportajda Zaqatalanın zəngin cüdo ənənələrindən bəhs olunur.
Əfqan Rzayev bildirib ki, Zaqatalada cüdo məktəbinin əsası 1980-ci ildə qoyulub. Rayon hələ sovet dövründən ölkənin aparıcı cüdo mərkəzlərindən biri hesab olunub və uzun illər Azərbaycan yığmasının təlim-məşq bazalarından biri kimi fəaliyyət göstərib.
Onun sözlərinə görə, 1980-ci illərdə cüdoçular Car kəndi ərazisində yerləşən "Turbaza" istirahət mərkəzində məskunlaşaraq həm zalda, həm də dağlıq ərazilərdə hazırlıq keçirdilər.
Hazırda isə Zaqatalada cüdoya maraq ildən-ilə artır. Məşqlərin keçirildiyi zallar günün ikinci yarısından etibarən idmançılarla dolur. Vaxt çatışmazlığı səbəbindən bəzi yaş qrupları üçün əlavə məşqlər də təşkil olunur.
Mütəxəssislərin fikrincə, rayonda formalaşan güclü cüdo məktəbi gələcəkdə də Azərbaycan idmanına yeni çempionlar qazandırmağa davam edəcək.
