Azərbaycanın futbol üzrə U-21 millisinin Avropa çempionatının seçmə mərhələsində Cəbəllütariq yığmasına qarşı keçirəcəyi oyun üçün heyət açıqlanıb.
Baş məşqçi Rəşad Eyyubovun seçimləri arasında bir ad xüsusilə diqqət çəkib - Birinci Liqa təmsilçisi “Zaqatala”nın yarımmüdafiəçisi Okan Təhməzli.
20 yaşlı futbolçu “Qəbələ” klubunun yetirməsidir. İki mövsüm əvvəl, cəmi 18 yaşında Premyer Liqada əsas komandada debüt edən Okan o vaxtkı baş məşqçi Kaxaber Tsxadadzenin də xüsusi rəğbətini qazanmışdı. Lakin sonradan gənc oyunçunun karyerasında gözlənilməz eniş baş verdi.
“Qəbələ”dən ayrılan Okan əvvəlcə İkinci Liqa təmsilçisi “Cəbrayıl”a keçdi, bu mövsümdən isə “Zaqatala”nın şərəfini qoruyur. Gənc yarımmüdafiəçi yenidən U-21 yığmasına çağırılmaqla karyerasında dönüş nöqtəsinə imza atıb.
Sportinfo.az-ın məlumatına görə, Okan Təhməzli milliyə dəvət almasının onun üçün böyük motivasiya olduğunu bildirib:
“Milliyə yenidən dəvət almaq çox xoş hissdir. Bu bayraq altında oynamaq hər bir futbolçu üçün böyük qürurdur. Üzərimdə əməyi olan hər kəsə təşəkkür edirəm. Enişlər və yoxuşlar futbolun bir parçasıdır, mənim üçün isə bunlar təcrübədir. “Qəbələ”dən sonra “Cəbrayıl”da yaxşı mövsüm keçirdim, indi isə “Zaqatala”da hər şey qaydasındadır. Burada mənə inanır və şans verirlər. Mənim məqsədim sadəcə milliyə çağırılmaq deyil, bu formanı daima daşımaq və onun dəyərini hiss etməkdir”.
Okan Təhməzli bir daha sübut etdi ki, istedad və əzm birləşəndə ikinci şanslar həmişə mümkündür.
