“Bakıdan çıxanda hiss etdim ki, vəziyyətim getdikcə pisləşir”.
Bu sözləri bir neçə gün öncə zəhərlənən və bu səbəbdən Yaponiyada keçirilməsi planlaşdırılan Rizin turnirində iştirak edə bilməyən azərbaycanlı MMA döyüşçüsü Vüqar Kərəmov deyib.
Offsideplus.az-ın məlumatına görə o, hazırda özünü nisbətən yaxşı hiss etdiyini bildirib:
“Bakıda təyyarəyə minəndə halım yaxşı deyildi. Bir qədər sonra isə ürəyim bulanmağa başladı. Yaponiyaya çatanda isə vəziyyətim daha da pisləşdi. Yoxlanışdan keçəndə həkimlər zəhərləndiyimi dedilər. Döyüşməyə icazə vermədilər. Xeyirlisi. Ümid edirəm ki, tezliklə sağalıb, döyüşlərə qayıda biləcəyəm”.
Bu gün idmançımızın rəqibi yaponiyalı Koyomi Matsuşima olmalı idi.
Məlumat üçün bildirək ki, Xaçmazda dünyaya gələn Vüqar Kərəmov peşəkar MMA döyüşçüsü, uşu sandaçı, 4 qat dünya, 3 qat Avropa, 8 qat respublika çempionudur. Dünya Kubokunun sahibi olan idman ustası 2017-ci ildə baş tutan IV İslam Həmrəyliyi Oyunlarının gümüş medalçısıdır.
