Xaçmazlı MMA döyüşçüsü Vüqar Kərəmov Yaponiyanın nüfuzlu "Super RIZIN 5" turnirində Ryo Takagi üzərində qazandığı qələbədən sonra qarşılaşma barədə fikirlərini bölüşüb.
Shimal.News xəbər verir ki, 33 yaşlı Vugi bu barədə açıqlamasında danışıb.
İdmançı bildirib ki, döyüş komandası ilə birlikdə hazırladıqları ssenari üzrə keçib. O, üç raundun sonunda hakimlərin yekdil qərarı ilə qalib gəlib.
"Əvvəlcə ayaqüstə işləyib, ardından parterə keçərək ağrılı fənd və ya zərbələrlə üstünlük qazanmağı planlaşdırmışdıq", – deyə Kərəmov bildirib.
Döyüşçünün sözlərinə görə, Takagi ilə qarşılaşma çempionluq kəmərinə gedən yolda keçid xarakteri daşıyıb.
"Titul döyüşünə çıxmaq üçün qarşıda daha bir görüşüm qalıb. Onu da qazanmalıyam. Əsas hədəf kəməri yenidən geri qaytarmaqdır. Böyük ehtimalla, növbəti döyüşüm dekabrın sonunda baş tutacaq", – deyə azərbaycanlı idmançı qeyd edib.
Qeyd edək ki, Kərəmov 66 kq çəki dərəcəsində Ryo Takagi ilə üç raund mübarizə aparıb və hakimlərin 29:28, 30:27, 30:27 hesablı yekdil qərarı ilə qalib gəlib.
Xatırladaq ki, Vüqar Kərəmov 2023-cü ildə Mikuru Asakuranı məğlub edərək RIZIN-in 66 kq çəki dərəcəsində çempionluq kəmərini qazanıb. Həmin il Çihiro Suzukiyə məğlub olaraq titulunu itirib.
Mənbə: İdman.biz
