AFFA İntizam Komitəsi I Liqanın II turunun oyunları ilə bağlı bir sıra qərarlar qəbul edib.
Shimal.News xəbər verir ki, "Şahdağ Qusar" – "Karvan-Yevlax" qarşılaşmasında hər iki komandanın 5 futbolçusu sarı vərəqə aldığı üçün klublar ayrı-ayrılıqda 210 manat cərimələnib.
Eyni oyundan sonra meydançaya kənar şəxslərin daxil olması səbəbindən "Şahdağ Qusar"a əlavə 750 manat cərimə tətbiq edilib. Qusar təmsilçisinin ümumi cəriməsi 960 manat olub.
"Zaqatala" isə "Baku Sportinq"lə oyunda bir neçə qayda pozuntusuna görə ümumilikdə 1 110 manat cərimələnib. Komanda 4 futbolçunun sarı vərəqə almasına görə 210 manat, ilkin protokolun elektron bazada gec təsdiqlənməsinə görə 450 manat, matçın futbolçuların formasında yaranan problem səbəbindən gec başlamasına görə isə 450 manat ödəyəcək.
I Liqanın II turunun MOİK – "Şimal" oyununda 4 futbolçunun sarı vərəqə almasına görə "Şimal" komandası da 210 manat cərimələnib.
Beləliklə, təqdim olunan qərarlara əsasən, şimal bölgəsini təmsil edən üç klub – "Şahdağ Qusar", "Zaqatala" və "Şimal" – ümumilikdə 2 280 manat məbləğində cərimə alıb.
