Ötən gün "Şamaxı" FK Misli Premyer Liqasında öz meydanında növbəti dəfə böyük hesablı məğlubiyyətlə üzləşib.
Shimal.News xəbər verir ki, "Sabah" FK-nı qəbul edən "Şamaxı" rəqibinə 0:3 hesabı ilə məğlub olub.
Bu nəticə komandanın yüksək liqada ev oyunlarında qeydə alınan artıq 10-cu böyük hesablı məğlubiyyəti kimi tarixə düşüb. Üstəlik, "Şamaxı" cari mövsümdə doğma azarkeşləri önündə üçüncü dəfə üç və ya daha çox top fərqi ilə uduzub.
Bundan əvvəl komanda "Kəpəz"ə 1:4, Qəbələ FKyə isə 0:4 hesabı ilə məğlub olmuşdu. Beləliklə, komanda üçün bu mövsüm ev oyunları baxımından uğursuz seriya ilə yadda qalır.
Statistik göstəricilər də vəziyyətin ciddiliyini ortaya qoyur. Belə ki, "Şamaxı" tarixində bir mövsümdə bu qədər ağır ev məğlubiyyəti sonuncu dəfə 2022/23 mövsümündə qeydə alınıb.
Xatırladaq ki, klubun öz meydanında ilk böyük hesablı məğlubiyyəti 2000/2001 mövsümünə təsadüf edir. Həmin vaxt "Xəzər Universiteti" adı ilə çıxış edən komanda 2000-ci il oktyabrın 20-də "Neftçi" PFK-yə 1:4 hesabı ilə uduzub.
