1-ci Liqanın 12-ci turunun maraqlı qarşılaşmalarından biri Mingəçevirdə baş tutacaq.
Son turlarda uğurlu performansı ilə diqqət çəkən "Şahdağ Qusar" futbol klubu çempionluq uğrunda mübarizə aparan və hazırda 20 xalla 4-cü pillədə qərarlaşan "Mingəçevir"in qonağı olacaq.
Fanat.az-ın məlumatına görə, Qusar təmsilçisinin baş məşqçisi Rüstəm Məmmədov ağır səfərə yollanacaqlarını bildirib:
" "Mingəçevir" həqiqətən yaxşı komandadır. Rəqibin heyətində fərdi keyfiyyətləri ilə seçilən futbolçular, güclü legionerlər var. Amma mən heç vaxt futbolçularımdan 1 xal istəmirəm. Hər oyuna 3 xal üçün çıxırıq. Həmişə futbolçularıma turnir cədvəlindəki mövqeyindən asılı olmayaraq, bütün rəqiblərə hörmətlə yanaşmalı olduğumuzu xatırladıram.
Fikrimcə, maraqlı oyun olacaq. İstəyim odur ki, yekunda biz sevinək. Çünki xallara ehtiyacımız var. Hər iki komandaya uğurlar arzulayıram. Ümid edirəm ki, Mingəçevirdə keçiriləcək matçda sevinən tərəf biz olarıq".
Qeyd edək ki, dekabrın 24-də baş tutacaq "Mingəçevir" - "Şahdağ Qusar" qarşılaşması saat 14:00-da başlayacaq.
