Balakən rayonundan olan yunan-Roma güləşi üzrə olimpiya mükafatçısı, dünya çempionu, Universiada və I Avropa Oyunlarının qalibi Rəsul Çunayevə yeni vəzifə verilib.
Prosport.az-ın məlumatına görə, 35 yaşlı veteran idmançı Azərbaycan Güləş Federasiyasında Nümayəndəliklərlə iş şöbəsinin mütəxəssisi vəzifəsinə təyin olunub.
Bu barədə R. Çunayev özü açıqlama verib:
"Yanvarın 26-dan etibarən Güləş Federasiyasında Nümayəndəliklərlə iş şöbəsində fəaliyyətə başlamışam. Bu məsuliyyətli və şərəfli vəzifəyə təyin olunmağımda göstərilən yüksək etimada görə Federasiya rəhbərliyinə dərin təşəkkürümü bildirirəm. Ölkəmizdə güləşin davamlı inkişafı və beynəlxalq arenada nüfuzunun daha da gücləndirilməsi üçün üzərimə düşən vəzifələri vicdanla yerinə yetirəcəyəm".
Rəsul Çunayev bildirib ki, fəaliyyəti əsasən ölkə üzrə uşaq və yeniyetmə güləşinin inkişafına yönələcək:
"Regionlarda Uşaq-Gənclər İdman Məktəbləri ilə sıx əməkdaşlıq edəcək, güləş klublarının fəaliyyətinə əməli dəstək göstərilməsi üçün addımlar atacağam".
Qeyd edək ki, Azərbaycan Güləş Federasiyası daha əvvəl də karyerasını başa vuran tanınmış idmançıları işlə təmin edib. Belə ki, Mariya Stadnik qadın, Hacı Əliyev sərbəst, Rafiq Hüseynov isə yunan-Roma güləşi üzrə kurator vəzifələrinə təyin olunublar.
