Veteran futbolçu Rahid Əmirquliyev "Şahdağ Qusar" futbol klubu ilə yollarını ayırdığını açıqlayıb.
O, bununla bağlı sosial media hesabında paylaşım edib.
Həmin paylaşımı təqdim edirik:
"Bəzən həyatda ən çətin qərar insanın ən çox sevdiyi yerdən ayrılmaq olur.
Bu gün böyük qürur və kövrəklik hissi ilə doğma komandam - "Şahdağ Qusar"la vidalaşıram.
Bu klubda mən təkcə futbol oynamadım, həm də böyük bir ailənin üzvü oldum. Birlikdə çətinliklərdən keçdik, mübarizə apardıq və Allahın köməyi, komandamızın əzmi, siz dəyərli azarkeşlərin dəstəyi ilə 2-ci Liqanın çempionu olduq. Bu uğur bütün komandamızın, bütün Qusarın və hər zaman yanımızda olan azarkeşlərimizin uğurudur.
Doğma torpağımı və insanlarımızı təmsil etmək mənim üçün hər zaman böyük qürur olub. Həyat isə bəzən insanın qarşısına yeni yollar çıxarır. Klub rəhbərliyi ilə yaranan fikir ayrılığı səbəbindən komandadan ayrılmaq qərarı verdim. Bu, heç vaxt bu kluba olan sevgimin və bağlılığımın azalması demək deyil.
Birlikdə çalışdığım komanda yoldaşlarıma, məşqçilərimizə və bizi hər zaman dəstəkləyən əziz azarkeşlərimizə ürəkdən təşəkkür edirəm. Harada olsam da, "Şahdağ Qusar"ın uğurlarına sevinəcək və özümü həmişə bu ailənin bir parçası hesab edəcəyəm."
