"Qarabağ" UEFA Çempionlar Liqasındakı son matçda bütün Azərbaycan xalqını sevindirdi".
Bu sözləri Azərbaycan millisinin sabiq futbolçusu Rahid Əmirquliyev deyib.
Təcrübəli yarımmüdafiəçi UEFA Çempionlar Liqasında bu gün baş tutacaq "Liverpul" - "Qarabağ" oyunu haqqında da fikirlərini bölüşüb.
"Ayntraxt"la oyundakı qələbədən sonra hamımız istəyirik ki, uğurun davamı gəlsin. Ötən həftə bütün Azərbaycan xalqını sevindirdilər. Hamımız qələbə gözləyirdik. Rəqib Bundesliqada yuxarı pillələrdə yer alır. Buna baxmayaraq layiqli qalibiyyət əldə etdik", - deyə sport24.az-a açıqlamasında deyib.
R.Əmirquliyev bugünkü qarşılaşmanın "Qarabağ" üçün çox çətin keçəcəyini sözlərinə əlavə edib:
"Almaniya komandası nə qədər güclü olsa da, "Liverpul" "Ayntraxt" deyil, başqa səviyyədir. Mersisayd təmsilçisi çox güclüdür. Bəlkə də dünyadakı beş-altı böyük klubdan biridir. Onlar həmişə UEFA Çempionlar Liqasında və Premyer Liqada çempionluğa oynayırlar. Düşünürəm ki, komandamız üçün çox çətin olacaq. Əlbəttə, futbolda hər şey ola bilər. Meydan sahibləri aşkar favoritdir. Biz yenə "Qarabağ"a inanırıq. Ümid edirik ki, ən azı 1 xal qazana bilər. Amma yenə təkrarlayıram: bu, çox çətin olacaq. Şansları azdır".
Qeyd edək ki, UEFA Çempionlar Liqasında "Liverpul" - "Qarabağ" oyunu bu gün Bakı vaxtı ilə saat 23:59-da keçiriləcək.
