"Cəbrayıl"la oyunlarımız həmişə çətin keçir. Bu dəfə də qalib gələrək turnir cədvəlində xal ehtiyatımızı artırmaq istəyirdik, amma təəssüf ki, bu baş vermədi.
Sport24.az-ın məlumatına görə, bu sözləri Birinci Liqa təmsilçisi "Şahdağ Qusar"ın prezidenti və kapitanı Rahid Əmirquliyev deyib.
Təcrübəli futbolçu komandasının ötən gün Birinci Liqanın 22-ci turunda "Cəbrayıl"la heç-heçə etdiyi oyunla bağlı fikirlərini bölüşüb:
"3 xal itirdiyimizi düşünmürəm. Hər iki komanda qalib gələ bilərdi. Qol vurmaq üçün şanslarımız oldu, lakin onlardan yararlana bilmədik. Düşünürəm ki, qarşılaşmanın ədalətli nəticəsi heç-heçə idi".
36 yaşlı futbolçu karyerası ilə bağlı da açıqlama verib:
"Mövsümün sonuna az qalıb. Növbəti il karyeramı davam etdirib-etdirməyəcəyim hələ məlum deyil. Ümumiyyətlə, növbəti mövsümlə bağlı planlarımız dəqiqləşməyib. İstərdik ki, gələn mövsüm komandamız çempionluq uğrunda mübarizə aparsın. Qarşıda hələ vaxt var. Hazırda əsas məqsədimiz xal toplayaraq turnir cədvəlində mövqeyimizi yaxşılaşdırmaqdır".
Qeyd edək ki, "Cəbrayıl" - "Şahdağ Qusar" qarşılaşması 0:0 hesabı ilə başa çatıb.
