7-8 fevral 2026-cı il tarixlərində Bakı şəhərində yerləşən Sərhədçi Olimpiya İdman Mərkəzində MMA idman növü üzrə ölkə birinciliyi keçirilib. Yarışda respublikanın müxtəlif bölgələrindən olan gənc idmançılar mübarizə aparıb, Qusar təmsilçiləri isə əldə etdikləri nəticələrlə xüsusi diqqət çəkiblər.
Shimal.News xəbər verir ki, ölkə birinciliyində Qusar Olimpiya İdman Kompleksinin məşqçiləri Ravid Mirzəbəyov və Fərid Mirzəbəyovun yetirmələri uğurla çıxış ediblər.
Belə ki, İbrahim Tahirov 11-12 yaş kateqoriyasında 66 kq çəki dərəcəsində bütün görüşlərdə qalib gələrək I yerə layiq görülüb və qızıl medal qazanıb.
Eyni zamanda, 13-14 yaş kateqoriyasında 53 kq çəki dərəcəsində çıxış edən Mirzəbəyov Məhərrəm və Əmirbəyov Əmirbəy III yerə layiq görülərək bürünc medal əldə ediblər.
Bununla yanaşı, MMA üzrə məşqçi Arif Şixzadayevin yetirmələri - Qusar şəhər 2 nömrəli tam orta ümumtəhsil məktəbinin şagirdləri də yarışda uğurlu nəticələr göstəriblər. Yarışın nəticələrinə əsasən, 10-11 yaş kateqoriyasında 48 kq çəki dərəcəsində mübarizə aparan Omar Abdurahmanov bütün rəqiblərinə qalib gələrək I yerin sahibi olub və qızıl medal qaznıb.
Həmçinin, 11-12 yaş kateqoriyasında 30 kq çəki dərəcəsində çıxış edən Vadim Nemətov final mərhələsinə yüksələrək II yerə layiq görülüb və gümüş medal əldə edib.
İdmançıları və onların məşqçilərini qazandıqları uğurlar münasibətilə təbrik edir, gələcəkdə respublika və beynəlxalq yarışlarda daha böyük nailiyyətlər arzulayırıq.
