Qusar rayonunun Girik kəndindən olan Şıxrəcəb Şıxmuradov veteranlar arasında cüdo üzrə dünya çempionatında bürünc medal qazanıb.
Shimal.News xəbər verir ki, yarış Bosniya və Herseqovinanın paytaxtı Sarayevoda keçirilib. M3 yaş kateqoriyasında mübarizə aparan Şıxrəcəb 73 kq çəki dərəcəsində dünya çempionatını üçüncü pillədə başa vurub.
Azərbaycan cüdoçuları yarışda daha iki bürünc medal da əldə ediblər. Əhməd Məmmədov (-73 kq, M3) və Anar Ağayev (-90 kq, M4) də mundialı bürünc medalla tamamlayıblar.
Qeyd edək ki, çempionatın ilk yarış günündə Azərbaycan təmsilçiləri bir qızıl və üç bürünc medal qazanıblar. Məmmədəli Mehdiyev (-100 kq) dünya çempionu olub, Əbülfət İsmayılov (-60 kq), Mahir Abbasov (-81 kq) və Coşqun Abdullayev (-90 kq) isə bürünc medal əldə ediblər.
