Qusar rayonunda uşaq və yeniyetmələrin voleybola cəlb olunması məqsədilə seleksiya mərhələsi keçirilib.
Shimal.News xəbər verir ki, Azərbaycan Voleybol Federasiyasının dəstəyi ilə təşkil olunan seçimlər zamanı yüzə yaxın qusarlı uşaq və yeniyetmə uğur qazanaraq Qusar Olimpiya İdman Kompleksində peşəkar səviyyədə voleybolla məşğul olmaq imkanı əldə edib.
Yeni seçilmiş idmançılar və onların valideynləri ilə keçirilən görüşdə Qusar Rayon İcra Hakimiyyəti başçısının müavini Ceyhun Hacıyev və Sumqayıt Regional Voleybol Klubunun rəhbəri Tariyel Alverdiyev iştirak ediblər.
Görüşdə ölkədə voleybolun inkişafı, uşaq voleyboluna göstərilən diqqət və yaradılan şərait barədə məlumat verilib. Bildirilib ki, bu cür layihələr gələcəyin peşəkar idmançılarının yetişməsinə mühüm töhfə verəcək.
Qeyd olunub ki, Qusarda voleybolun inkişafı istiqamətində işlər davam etdiriləcək və gələcəkdə yeni layihələrin həyata keçirilməsi nəzərdə tutulur.
Tədbirin sonunda valideynləri maraqlandıran suallar cavablandırılıb, məşq prosesi və gələcək fəaliyyət planları barədə ətraflı məlumat verilib.
