Qubada beynəlxalq hakim Qüdrət İsmayılovun xatirəsinə həsr olunan "Quba Open 2026" II Beynəlxalq Şahmat Festivalı başa çatıb.
Shimal.News xəbər verir ki, 11 ölkədən 300-dən çox şahmatçının iştirak etdiyi festivalın yekununda qalib və mükafatçılar müəyyənləşib.
A turnirində 9 turdan sonra 7 xal toplayan Misrətdin İskəndərov birinci olub. Eyni xal toplayan Vüqar Manafov əlavə göstəricilərə əsasən ikinci, 6,5 xal qazanan Mixail Mozharov (FIDE) isə üçüncü yeri tutub.
B turnirində Əli Məmmədov 8 xalla qalib gəlib. Emin Gəncəliyev və Anar Bağışov 7 xalla ikinci və üçüncü yerləri bölüşüblər.
Festival çərçivəsində rapid və blits yarışları da keçirilib. Rüstəm Rüstəmov rapid, Xaqan Əhməd isə blits turnirində qalib olub.
Ümumi mükafat fondu 24 420 manat təşkil edən festivalda klassik şahmat, rapid, blits və norma turnirləri üzrə yarışlar keçirilib.
Qeyd edək ki, "Azərbaycan Şahmat Turu"nun növbəti yarışı "Gəncə Open" olacaq. Turnirin oktyabrın 11-dən 18-dək keçirilməsi planlaşdırılır.
