Qubada Azərbaycan Respublikasının Gənclər və İdman Nazirliyi, Azərbaycan Şahmat Federasiyası (AŞF) və "Ağ Top" Şahmat Klubunun birgə təşkilatçılığı ilə "Quba Open 2026" Beynəlxalq Şahmat Festivalının açılış mərasimi keçirilib.
Shimal.News xəbər verir ki, mərasimdə çıxış edən Azərbaycan Şahmat Federasiyasının prezidenti, Beynəlxalq Şahmat Federasiyasının vitse-prezidenti Mahir Məmmədov regional turnirlərin ölkədə şahmatın kütləviliyinin artırılmasında mühüm rol oynadığını vurğulayıb.
AŞF prezidenti "Quba Open" Beynəlxalq Şahmat Festivalının "Azərbaycan Şahmat Turu"nun mühüm tərkib hissələrindən biri olduğunu qeyd edib.
Bildirilib ki, sayca ikinci dəfə keçirilən festival şahmat ənənələrinin inkişafında və Quba şahmat məktəbinin formalaşmasında müstəsna xidmətləri olan beynəlxalq hakim Qüdrət İsmayılovun əziz xatirəsinə həsr olunub.
Yarışın ümumi mükafat fondu 24 420 manat təşkil edir. Festivalda 11 ölkədən 300-dən çox şahmatçı mübarizə aparır.
