Qəbələ rayonu bu gün beynəlxalq velosiped yarışının növbəti mərhələsinə ev sahibliyi edir.
Shimal.News xəbər verir ki, "Bakı–Xankəndi" Azərbaycan velosiped yarışının üçüncü mərhələsinə bu gün, saat 09:20-də start verilib. Velosipedçilər Qəbələ şəhərindən Mingəçevir şəhərinə qədər uzanan 162,9 kilometrlik marşrut üzrə mübarizə aparırlar.
Yarışın əvvəlki mərhələlərində də gərgin mübarizə yaşanıb. Bakı–İsmayıllı marşrutu üzrə keçirilən ikinci mərhələnin qalibi Astananın qazaxıstanlı üzvü Yevgeniy Fedorov olub. Bakı–Sumqayıt istiqamətində təşkil olunan ilk mərhələdə isə Çinin Li-Ninq Star komandasının belaruslu üzvü Aleksey Şnirko finiş xəttini birinci keçib.
Qeyd edək ki, Beynəlxalq Velosipedçilər İttifaqının 2.1 kateqoriyalı yarışında dünyanın 20 ölkəsini təmsil edən 24 komanda iştirak edir. Beş mərhələdən ibarət turnirin ümumi mükafat fondu 50 min avrodan çoxdur.
"Bakı–Xankəndi" veloyürüşünə mayın 14-də yekun vurulacaq. Yarışın final mərhələsi Xankəndi şəhərində keçiriləcək.
