"Qəbələ"nin yeni baş məşqçisi Yeton Bekirinin məşqçilər korpusunda yer alacaq mütəxəssislərdən birinin adı açıqlanıb.
Burhan Emurllai şimali makedoniyalı çalışdırıcının əsas köməkçisi olacaq. Məlumatı "Qırmızı-qaralar"ın mətbuat katibi Elnur Məmmədli İdman.Biz-ə açıqlamasında təsdiqləyib.
Emurllai daha əvvəl də Bekiri ilə eyni məşqçilər korpusunda çalışıb. Onlar 2024/2025 mövsümündə "Şkendiya" ilə Şimali Makedoniya çempionu olublar.
44 yaşlı Yeton Bekiri "Qəbələ" ilə 1+2 illik müqavilə imzalayıb və yeni vəzifəsinin icrasına sentyabrın 20-dən başlayacaq.
Xatırladaq ki, "Qəbələ" mövsümə Kaxaber Tsxadadzenin rəhbərliyi ilə başlayıb. Azərbaycan Premyer Liqasındakı uğursuz startdan sonra avqustun 31-də gürcüstanlı mütəxəssislə müqaviləyə qarşılıqlı razılaşma əsasında xitam verilib.
Komanda ilk üç turda cəmi bir xal toplayıb. Bu görüşlərdə iki məğlubiyyət və bir heç-heçə qeydə alınıb, "Qəbələ" isə rəqib qapılarına qol vura bilməyib.
Tsxadadzenin ayrılmasından sonra komandanın hazırlığını məşqçilər korpusu həyata keçirib. "İmişli" ilə 2:1 hesablı qarşılaşmanın protokolunda isə "Qəbələ"nin məşqçisi kimi Manaf Kələntərlinin adı göstərilib.
Mənbə: İdman.Biz
