Misli Premyer Liqasında 5-ci turun qarşılaşmaları davam edir. Bu gün turun proqramında iki oyun keçiriləcək.
Shimal.News xəbər verir ki, günün ilk matçında "Kəpəz" Gəncə şəhər stadionunda "Qəbələ"ni qəbul edəcək. Görüş saat 17:30-da başlayacaq.
Gəncə təmsilçisinin ev oyununa böyük azarkeş marağı gözlənilir. Maraqlı məqam odur ki, Gəncə şəhər stadionunda azarkeş rekordu məhz "Şamaxı" – "Kəpəz" matçında qeydə alınıb. 4-cü turda keçirilən həmin qarşılaşmanı 15 min tamaşaçı izləyib.
Bu göstərici 3-cü turda eyni arenada keçirilmiş "Kəpəz" – "Turan Tovuz" görüşündə qeydə alınan 13 500 nəfərlik rekordu geridə qoyub. Həmin oyunda isə "Kəpəz" azarkeşləri komandanın 1:4 hesablı məğlubiyyətinin şahidi olublar.
İndi Gəncə təmsilçisi doğma stadionda "Qəbələ" ilə qarşılaşacaq. "Kəpəz" bu dəfə həm meydan amilindən yararlanmağa, həm də əvvəlki turdakı ağır məğlubiyyətdən sonra azarkeşlərini sevindirməyə çalışacaq.
Günün ikinci oyununda "Sumqayıt" "Şamaxı"nı qəbul edəcək. "SOCAR Polymer Arena"da keçiriləcək qarşılaşma saat 19:45-də başlayacaq.
Turun daha əvvəl keçirilən oyununda "İmişli" "Neftçi"yə 2:3 hesabı ilə uduzub.
