"Neftçi" Azərbaycan çempionatlarının yüksək dəstəsində 1000-ci oyununu Qəbələdə keçirəcək. "Ağ-qaralar" ölkə futbolu tarixində bu göstəriciyə çatan ilk klub olacaq.
Shimal.News-un məlumatına görə, Bakı təmsilçisi indiyədək yüksək dəstədə 999 matç keçirib. Komandanın yubiley oyunu Misli Premyer Liqasının VI turunda "Qəbələ"yə qarşı səfər görüşünə təsadüf edəcək.
"Neftçi" və "Qarabağ" Azərbaycan çempionatlarının bütün mövsümlərində yüksək dəstədə çıxış edən iki klubdur. Mövsümün əvvəlində hər iki komandanın hesabında 994 oyun olsa da, "Qarabağ"ın II turdakı "Kəpəz"lə matçının təxirə salınması "Neftçi"nin yubileyə daha tez çatmasına imkan verib.
"Neftçi"nin müstəqillik dövründə ilk çempionat oyunu isə 8 may 1992-ci ildə "Xəzər"ə qarşı keçirilib. Bakıdakı qarşılaşmada "ağ-qaralar" 1:0 hesabı ilə qalib gəlib. Həmin matçda yeganə qolu penaltidən Yunis Hüseynov vurub.
999 oyunda "Neftçi" 549 qələbə, 227 heç-heçə və 223 məğlubiyyət əldə edib. Komanda rəqib qapılarına 1679, öz qapısına isə 838 top buraxıb.
Klubun Azərbaycan çempionatlarındakı ən məhsuldar futbolçusu Samir Ələkbərovdur – 99 qol. Ən çox oyun keçirən futbolçu isə hazırkı kapitan Emin Mahmudovdur. O, indiyədək 242 çempionat matçında meydana çıxıb.
"Neftçi" 999 oyun ərzində 9 dəfə Azərbaycan çempionu olub, 5 dəfə gümüş, 7 dəfə isə bürünc medal qazanıb.
Yubiley matçı klubun tarixindəki 10-cu "100-lük" qarşılaşması olacaq. "Neftçi" əvvəlki əlamətdar oyunlarında 6 qələbə qazanıb, 1 heç-heçə edib və 3 dəfə məğlub olub. 1000-ci matç isə Qəbələdə keçiriləcək.
