"Bəli, artıq "Şəfa"nın futbolçusuyam. "Qəbələ"dən ayrılmağımla bağlı bəzi məsələlər oldu, danışdıq və sonda yollarımızı ayırdıq. "Şəfa"dan da təklif gəldi, görüşdük və yanaşmalarını bəyəndim. Mənə göstərilən etimada görə "Şəfa"nı seçdim", - deyə futbolçu bildirib.
Sportal.az-ın məlumatına görə, bu sözləri "Şəfa"nın yeni transferi Murad Musayev deyib.
Sabiq "Qəbələ" kapitanı yeni klubundakı perspektivindən də danışıb. Onun sözlərinə görə, komanda yenidən qurulur və hər bir futbolçunun üzərinə böyük məsuliyyət düşür:
"İndiki vəziyyətdə biz də əlimizdən gələni edəcəyik ki, kluba xeyrimiz dəysin".
Murad Musayev "Qəbələ" ilə qarşılaşmaların onun üçün prinsipial olmayacağını da vurğulayıb:
"Qəbələ ilə keçiriləcək matçlara gəldikdə, bu klub mənim həm futbolda, həm də həyatımda böyük rol oynayıb. Orada gözəl günlərim olub, çoxlu xatirələrim var. "Qəbələ"yə qarşı heç bir prinsipim ola bilməz. Həmişə digər oyunlara necə hazırlaşmışamsa, bu komandaya qarşı da eyni şəkildə hazırlaşacağam".
