“O mənim dayımoğlu yox, qardaşım idi. Biz bir evdə böyümüşük”.
Qafqazinfo.az-ın məlumatına görə, bunu Azərbaycan millisinin üzvü Mahir Emreli deyib.
O, noyabrın 1-də meyiti tapılan dayısıoğlu Sabit Ağayevdən danışıb:
“Həmin gecə bu xəbəri eşitdim və sabaha qədər yata bilmədim. Mənim üçün çox dəhşətli bir xəbər idi. Harasa gedəndə dost-tanışlara onu qardaşım kimi təqdim edirdim, çünki biz həqiqətən də qardaş kimiydik. Mən “Konyaspor”da çıxış edəndə o da yanımda idi, bir evdə yaşayırdıq.
Bir müddət saçlarımı sarı rəngə boyamağımın səbəbi də Sabit idi. O, “Qalatasaray” futbolçusu Mauro İkardinin azarkeşi idi. Ona görə də məndən xahiş edirdi ki, saçımı sarı rəngə boyayım, mən də etdim.
Sabit özü də futbolçu olub. “Simurq” klubunda çıxış edib, əvəzedici heyətdə bir çox oyuna çıxıb. Lakin sonradan “Zaqatala” klubu dağıldığı üçün futbolu buraxdı. İşi var idi, həyatı qaydasında idi. Niyə intihar etdiyini hələ də anlaya bilmirəm. Çünki çox zarafatcıl, şən insan idi. Mesaj yazanda belə elə pozitiv olurdu ki, düşünürdün ki, ondan xoşbəxt adam yoxdur. Nə baş verdi, nə dəyişdi, bilmirəm. Üstəlik, evli idi, 4-5 aylıq körpəsi var idi. Amma hamımızı bədbəxt edib getdi. Hələ də özümə gələ bilmirəm...”
M. Emreli həmçinin mərhum dayısı oğlu haqqında yayılan şayiələrə də aydınlıq gətirib:
“Onun toy maşınını da mən idarə etmişəm. Nə problemi olsa, mənə deyərdi. Bilmirəm, niyə belə oldu. Hər kəs yazır ki, guya borcu var idi, amma bunlar boş söhbətlərdir. Heç kim çıxıb deyə bilməz ki, onun borcu olub. Kirayə evə çıxalı cəmi 2-3 həftə idi. Amma hamı deyir ki, guya kirayədə yaşayırmış - bunların hamısı şayiədir. Bu, elə bir məsələdir ki, yalnız ailəsi bilər. Biz buna qarışa bilmərik”.
