Azərbaycanla Litva arasında münasibətlər kifayət qədər qədim tarixə malikdir. Müstəqilliyimizi tanıyan ilk ölkələrdən biri olan Litva ilə diplomatik əlaqələr 1995-ci ildə qurulub. 2007-ci ilin aprelində Litvanın ölkəmizdə, həmin ilin sentyabrında isə Azərbaycanın Litvada səfirliyi fəaliyyətə başlayıb. Hazırda strateji tərəfdaş olan iki ölkə arasında əməkdaşlıq çox geniş spektri əhatə edir və bu əlaqələri qarşılıqlı inkişaf etdirmək üçün yeni və böyük potensial mövcuddur.
Litvanın Azərbaycandakı fövqəladə və səlahiyyətli səfiri Kestutis Vaşkeleviçus müsahibəsində iki ölkə arasında münasibətlərin tarixi, əməkdaşlıq üçün yeni imkanlar, Litvanın Azərbaycanın beynəlxalq tərəfdaşlarla əlaqələrinə verdiyi töhfələrdən və digər mövzulardan danışıb.
O, mühasibə zamanı "Bu dövr ərzində ölkənin hansı bölgələrinə səfər etmisiniz? Hara sizdə güclü təəssürat yaradıb?" sualına dağlıq bölgələrimizi sevdiyini deyərək cavab verib:
- Məndə ən güclü təəssürat yaradan yer Bakıdır, paytaxtın, xüsusilə şəhərin mərkəzinin necə dəyişməsidir. Həmçinin ölkənin dağlıq bölgələri də çox gözəldir. Səhv eləmirəmsə, altı dəfə Şahdağda olmuşam. Bununla yanaşı, Şəki, Şamaxı və Qəbələni ziyarət etmişəm, oralar çox gözəl dağlıq ərazilərdir. Həmçinin Azərbaycanın zəngin tarixinin mühüm hissəsinin yerləşdiyi Gəncəyə getmişəm. Mingəçevirdə də olmuşam, orada gözəl su anbarı, hidroelektrik stansiyası və göl var. Sonra, əlbəttə, Qarabağda - Kəlbəcərdə, Şuşada, Xankəndidə, Zəngilanda, Cəbrayılda olmuşam. Məşhur kurort və maraqlı tarixə malik Naftalana da səfər etmişəm. Qısası, bu dövr ərzində Azərbaycanın kifayət qədər çox bölgəsində olmuşam və ölkəni bir az daha kəşf etməyi səbirsizliklə gözləyirəm.
Mənbə: Qafqazinfo
