İsmayıllı rayonunda çoxgünlük ötüşmələr üzrə Azərbaycan çempionatına yekun vurulub.
Shimal.News xəbər verir ki, Gənclər və İdman Nazirliyi ilə Azərbaycan Velosiped İdmanı Federasiyasının birgə təşkil etdiyi yarışda qaliblər üç günün nəticələrinə əsasən müəyyənləşib.
Mövsümün şose velosipedi üzrə sonuncu daxili yarışının ilk və üçüncü günlərində iştirakçılar qrup ötüşməsində, ikinci günündə isə fərdi ötüşmədə mübarizə aparıblar.
Elit/U-23 kateqoriyasında Şahin Eyvazov çempion olub. Nofəl Nuriyev ikinci, Əli Qurbanov üçüncü yeri tutub. Hər üç velosipedçi "AE Cycling School" komandasını təmsil edib.
Gənclər kateqoriyasında Nihad Xudoyev (ROEQIUGVM) birinci olub. Murad Nadirov ("Təhsil") ikinci, Həsən Zeynalov (ROEQIUGVM) üçüncü yeri tutub.
U-17 yaş qrupunda qızıl medala Ümid İsmayılov, gümüş medala isə İlkin Sadıqzadə ("Təhsil") sahib çıxıb. Əli Zeynalzadə (ROEQIUGVM) bürünc medal qazanıb.
U-15 kateqoriyasında isə üç yarış gününün yekununda Emil Abbasov ("AE Cycling School") ən yaxşı nəticəni göstərib. İsmayıl Xankişiyev və Mirəli Miryəhyayev (ROEQIUGVM) ilk üçlükdə yer alıblar.
Fərqlənən velosipedçilər medal, diplom və pul mükafatı ilə təltif ediliblər.
