"Şahdağ Qusar"ın baş məşqçisi Füzuli Məmmədov, sabiq komandası "Karvan-Yevlax"ı 2:0 hesabı ilə məğlub etdikləri I Liqanın II tur matçından sonra müsahibə verib.
– Bu oyun sizin üçün nə dərəcədə prinsipial əhəmiyyət kəsb edirdi?
– Heç bir prinsipiallığı yox idi. "Karvan-Yevlax" mənə doğmadır, o komandanın baş məşqçisi olmuşam, klub və rəhbərliyinə xüsusi hörmətim var. Sadəcə, çempionatın hər bir oyununa 3 xal üçün çıxırıq. Bilirdik ki, "Karvan-Yevlax" güclü komandadır, heyətindəki futbolçular çox keyfiyyətlidir və oyun bizim üçün çətin olacaq. Oyuna maksimum dərəcədə ciddi hazırlaşmışdıq ki, qələbə qazanaq. Futbolçularımızla yanaşı, azarkeşlərimizə də təşəkkür edirəm. Tərəfdarlarımız bizi durmadan dəstəklədilər və bizə xüsusi motivasiya verdilər.
– Bir çox yeni transferlər etmisiniz. Onlardan nə dərəcədə razısınız?
– Təbii ki, təkcə "Karvan-Yevlax"a qol vuran İdir Butrif və Joze Zenqo yox, digər transferlərimiz da yaxşıdır. Çox yaxşı transferlər etmişik. Yeni oyunçular komandaya maksimum uyğunlaşmağa və tapşırıqlarımı həm məşqdə, həm də oyunda yerinə yetirməyə çalışırlar. Belə olduqda, futbolçularımız tez uyğunlaşırlar. Ən sonuncu transferimiz İdir də ilk oyununda həm qol vurdu, həm də irəlidəki əzmkarlığı ilə komandaya böyük dəstək oldu. Nəinki o, eyni zamanda omandanın bütün oyunçuları meydanda maksimum güclərini ortaya qoydular.
– Yenə Qusarda oynamayacaqsınız, amma rəqiblərinizi artıq Şamaxıda deyil, Bakıda qəbul edəcəksiniz. Paytaxtda oynamaq başqa bir rayonla müqayisədə sizə nə dərəcədə əlverişlidir?
– Təbii ki, ən böyük üstünlüyümüz Qusarda oynamaq olardı. Çünki hazırda bizi Binədəki oyunlarımızda cəmi bir tribunalıq azarkeş dəstəkləyirdisə, doğma arenamızda bütün tribunalar fanatlarımızla dolardı. Qusarlı tərəfdarlar xeyli əzmkar, istəkli və komandalarına çox bağlıdırlar. Ona görə də yaxşı olardı ki, Qusarda oynayaq. Təəssüf ki, müəyyən səbəblərdən bu, alınmır. Amma fikrimcə, gələn mövsümdən yeni stadionumuzda çıxış edə biləcəyik.
– Premyer Liqadakı mübarizə sizi də maraqlandırmalıdır. Çünki həm bir neçə klubunda oynamısınız və baş məşqçi kimi çalışmısınız, həm də I Liqada ikinci yeri tutsanız, elitanı 11-ci yerdə bitirən komanda ilə pley-off matçında qarşılaşacaqsınız. Bu mövsüm Premyer Liqakı mübarizə sizə necə təsir bağışlayır?
– Mübarizə yeni başlayıb, hələ çox da fikir bildirmək olmur. Üstəlik, qış fasiləsində də yeni transferlər olacaq, komandalar daha da güclənəcəklər. Mövsümün sonlarına doğru dediyiniz vəziyyət yaranarsa, biz də diqqətimizi elitaya yönəldərik. Hazırda isə bütün fikrimiz öz oyunlarımızdadır.
– Bəs proqnozunuz nədir?
– Hazırda hər hansı proqnoz vermək çətindir. Bu gün hansısa komanda aşağı pillədədirsə, zamanla güclənərək yuxari mövqelərə qalxa bilər.
– "Karvan-Yevlax"dan ayrıldığınıza görə hər hansı incikliyiniz yoxdur?
– Xeyr, heç bir incikliyimiz olmadı. Çünki klubun rəhbəri Şahmar Vəliyevə xüsusi hörmətim var. Onunla görüşüb-danışdıq və qərara aldıq ki, yollarımızı ayıraq. Bu gün ayrılsaq da, "Karvan-Yevlax" və Şahmar müəllimə böyük sayqı ilə yanaşıram.
Mənbə: Sportify.az
