Birinci Liqanın 10-cu turunda "Zaqatala" ilə heç-heçə edən "Şəfa" komandasının baş məşqçisi Elgiz Kərəmli qarşılaşma barədə fikirlərini bölüşüb.
Baş məşqçi bildirib ki, komandası matçın böyük hissəsində üstün tərəf olub, lakin yaradılan qol imkanlarından yararlana bilməmək nəticəyə təsir göstərib:
"Oyuna nəzarət edən tərəf biz idik. Çoxsaylı qol epizodları yaratdıq, amma "Difai" ilə oyunda olduğu kimi bu imkanları dəyərləndirə bilmədik. Matçın belə keçəcəyini gözləmirdim. Düşünürdüm ki, rəqib daha çox hücuma meyilli oynayacaq. Lakin "Zaqatala" müdafiəyə çəkilməyə üstünlük verdi və bu da işimizi daha da çətinləşdirdi".
E. Kərəmli hesab edir ki, komandası qələbəyə daha yaxın olub, lakin buraxılan qolda ardıcıl top itkiləri rol oynayıb:
"Qələbəyə haqqımız vardı. Futbolçularım yaxşı oyun sərgilədilər. Qol buraxmağımıza səbəb həmin dəqiqələrdə ard-arda baş verən məntiqsiz top itkiləri oldu. Mövsümün sonuna qədər stabilliyi qoruyub-saxlaya bilsək, çempionluq şansımız yüksəkdir. Növbəti turda qələbə qazanaraq bu xal itkisini azarkeşlərimizə unutdurmağa çalışacağıq".
Qeyd edək ki, ilk dövrəni məğlubiyyətsiz və 23 xalla lider kimi başa vuran "Şəfa", ikinci dövrənin açılış oyununda "Zaqatala" ilə qarşılaşmada 1:1 hesabı ilə kifayətlənib.
