Balakən rayonunda Ümummilli Lider Heydər Əliyevin anadan olmasının 103-cü ildönümünə həsr olunan şahmat turniri başa çatıb.
Shimal.News xəbər verir ki, Balakən Uşaq Gənclər İdman-Şahmat Məktəbi və Gənclər və İdman sektorunun birgə təşkilatçılığı ilə keçirilən yarışa 68 gənc şahmatçı qatılıb. Turnir 6, 8 və 10 yaşadək oğlan və qızlar arasında təşkil olunub.
Bağlanış mərasimində əvvəlcə Dövlət Himni səsləndirilib, daha sonra Ulu Öndər Heydər Əliyevin və şəhidlərin xatirəsi bir dəqiqəlik sükutla yad edilib.
Tədbirdə çıxış edən təşkilatçılar Balakəndə gənclərin şahmata marağının ildən-ilə artdığını bildirərək, bu cür yarışların yeni istedadların üzə çıxarılmasında mühüm rol oynadığını vurğulayıblar.
Yarışın nəticələrinə əsasən, hər yaş qrupu üzrə ilk üç yeri tutan oğlan və qız şahmatçılar diplom və kuboklarla mükafatlandırılıblar.
