Balakən rayonunda məktəblilər arasında velosiped yarışı təşkil olunub.
AZƏRTAC-ın məlumatına görə, yarış Azərbaycan Respublikasının Gənclər və İdman Nazirliyi, Azərbaycan Velosiped İdmanı Federasiyası, Azərbaycan Həmkarlar İttifaqları İdman Təşkilatları Assosiasiyası, Balakən Rayon İcra Hakimiyyəti və Şəki-Zaqatala Regional Təhsil İdarəsinin dəstəyi ilə keçirilib.
Yarışda Balakən, Zaqatala və Qax rayonlarından ümumilikdə 200 məktəbli iştirak edib. Açılış mərasimində Balakən Rayon İcra Hakimiyyətinin başçısı Natiq Ağayev çıxış edərək gənclər arasında sağlam həyat tərzinin təbliği baxımından velosiped idman növünün əhəmiyyətini vurğulayıb və iştirakçılara uğurlar arzulayıb.
Tədbirdə həmçinin Şəki-Zaqatala Regional Gənclər və İdman İdarəsinin rəisi Ramiz Mahmudov, AHİİTA-nın direktor müavini Fikrət Hacıyev və "Toba" şirkətinin əməkdaşı Həsən Seyfullayev çıxış edərək bu cür yarışların yeniyetmələr arasında idmana marağın artırılmasında mühüm rol oynadığını bildiriblər.
Gərgin və maraqlı mübarizə şəraitində keçən yarışda iştirakçılar 3,5 kilometrlik məsafədə müxtəlif yaş kateqoriyaları üzrə qalib adı uğrunda mübarizə aparıblar.
Yarışın yekununda qalib və mükafatçılar diplom və medallarla təltif olunublar. Eyni zamanda, hər yaş kateqoriyası üzrə birinci yeri tutan idmançılara velosiped hədiyyə edilib.
