Futbol üzrə Azərbaycan İkinci Liqasında mübarizə aparan “Şəki” komandasının baş məşqçisi Bəhmən Həsənov vəzifəsindən istefa verib.
Shimal.News xəbər verir ki, tərəflər arasındakı müqaviləyə baş məşqçinin istəyi ilə, qarşılıqlı razılıq əsasında xitam verilib.
“Bəhmən müəllim daim peşəkarlığı və futbola sevgisi ilə seçilən adlardan olub. Onun komandamızda göstərdiyi əməyə görə minnətdarlığımızı bildirir, gələcək fəaliyyətində və həyat yolunda uğurlar arzulayırıq”, - deyə klubun mətbuat xidməti məlumat yayıb.
Eləcə də “Şəki”nin köməkçi məşqçi Zeynal Hüseynovun da postundan ayrıldığını diqqətə çatdırıb. Tərəflər arasındakı müqaviləyə qarşılıqlı razılıq əsasında xitam verilib. Klub Hüseynova da verdiyi töhfələrə görə minnətdarlığını bildirib, gələcək karyerasında uğurlar arzulayıb.
“Şəki” İkinci Liqanın cari mövsümündə keçirdiyi 4 oyunda cəmi 2 qələbə qazanıb, 2 dəfə məğlub olub. Komanda 6 xalla 12 iştirakçı arasında 6-cı pillədə qərarlaşıb.
