"Araz-Naxçıvan" növbəti ev oyunlarını Qəbələdə deyil, Şamaxı şəhər stadionunda keçirəcək. Klubun köçməsinin əsas səbəblərindən birinin maliyyə olduğu bildirilir.
Məlumata görə, Qəbələdə ev oyunu keçirmək klub üçün daha çox xərc yaradır. Komanda matçdan bir gün əvvəl Qəbələyə gedərək hoteldə qalmalı olur. Bundan başqa, stadionundakı təbii ot örtüyünün icarə xərclərinin daha yüksək olduğu qeyd edilir.
Şamaxı şəhər stadionunda isə süni örtükdən istifadə olunur. Bu amil icarə xərclərini azaltmaqla yanaşı, komandanın oyun günü Bakından Şamaxıya gedib-qayıtmasına da imkan verir.
Klub rəhbərliyinin bu amilləri nəzərə alaraq ev oyunlarını Şamaxıda keçirmək qərarına gəldiyi bildirilir.
Hazırda "Araz-Naxçıvan"ın sentyabrın 13-də "Turan Tovuz"la ev oyunu Şamaxı şəhər stadionunda göstərilir.
