Premyer Liqada yerini "Mingəçevir"lə keçirilən pley-off matçında qələbə hesabına qoruyan "Qəbələ"də vəziyyət sakitləşmək bilmir. Klubda artıq açıq şəkildə "yarpaq tökümü" başlayıb və ayrılıqlar zənciri davam edir.
Fanat.az-ın məlumatına görə, bölgə təmsilçisi daha iki futbolçu ilə yollarını ayırmağa hazırlaşır.
Komanda daxilində yenidənqurma prosesi sürətləndirilir və bu qərarlar artıq "təmizlənmə dalğası" kimi dəyərləndirilir.
Müqavilə ilə "Neftçi"yə məxsus olan və qışdan etibarən icarə əsasında "Qəbələ"də çıxış edən 22 yaşlı qapıçı mövsümün sonunda Bakı klubuna geri dönəcək. Onunla yeni müqavilənin imzalanmayacağı da artıq demək olar ki, dəqiqləşib.
Klubdan ayrılanlar siyahısına fransız legioner Sambu Sissoko da əlavə olunur. Qış fasiləsində "Valensyen"dən icarəyə götürülən 26 yaşlı dayaq yarımmüdafiəçisi gözləntiləri doğrultmayıb. Zədələr səbəbindən son 7 oyunda meydana çıxa bilməyən futbolçu "Qəbələ" forması ilə cəmi 8 matçda 456 dəqiqə oynayıb və komandanın planlarında artıq yer almır.
Xatırladaq ki, "Qəbələ" daha əvvəl də bir neçə ayrılıq yaşamışdı — müqaviləsi başa çatan İbrahim Sanqare və Rüfət Əhmədov, eləcə də icarə əsasında çıxış edən Turan Manafov da klubdan ayrılanlar siyahısına qoşulmuşdu.
Beləliklə, "Qəbələ"də dəyişikliklər dalğası dayanmaq bilmir və komanda yeni mövsümə tamamilə fərqli heyətlə başlamağa hazırlaşır.
