Azərbaycan 1-ci Liqasında 2026/2027 mövsümünün II turuna start verilir. Turun açılış matçı həm komandaların uğurlu başlanğıcı, həm də baş məşqçilər arasındakı tanışlıq baxımından diqqət çəkir.
Shimal.News xəbər verir ki, ilk qarşılaşmada "Şahdağ Qusar" "Karvan-Yevlax"ı qəbul edəcək.
Oyunun əsas intriqalarından biri iki komandanın baş məşqçilərinin yaxın keçmişi ilə bağlıdır. "Şahdağ Qusar"ın çalışdırıcısı Füzuli Məmmədov və "Karvan-Yevlax"ın baş məşqçisi Ramiz Məmmədov vaxtilə "Mingəçevir"də biri digərini əvəzləyib.
Füzuli Məmmədov 2025-ci ilin əvvəlindən "Mingəçevir"ə rəhbərlik edib. Mövsümün sonunda onunla yollar ayrılıb və 2025/2026 mövsümünün startından komandanın başına Ramiz Məmmədov keçib. İndi isə iki mütəxəssis bu dəfə rəqib komandalara rəhbərlik edərək üz-üzə gələcəklər.
Hər iki kollektiv yeni mövsümə qələbə ilə başlayıb. "Şahdağ Qusar" ilk turda MOİK-i səfərdə 1:0 hesabı ilə məğlub edib. "Karvan-Yevlax" isə "Baku Sportinq" üzərində 3:0 hesablı inamlı qələbə qazanıb.
Beləliklə, Qusar təmsilçisi doğma bölgədən kənarda keçirəcəyi oyunda ardıcıl ikinci qələbəsini, Yevlax komandası isə liderlik iddiasını gücləndirəcək növbəti 3 xalı hədəfləyəcək.
II tur — 9 sentyabr16:30 — "Şahdağ Qusar" – "Karvan-Yevlax"
Binə qəsəbə stadionu
Hakimlər: İslam Məmmədov, Asif Abdullayev, Orxan İbişov, Murad Səlimov
Hakim-inspektor: Asim Xudiyev
AFFA nümayəndəsi: Bəhram Qurbanov
Turun digər oyunları isə 10 və 11 sentyabr tarixlərində keçiriləcək:
10 sentyabr: "Zaqatala" – "Baku Sportinq", "Səbail" – "Mingəçevir", "Gəncəbasar" – "Xankəndi"
11 sentyabr: MOİK – "Şimal"
