Son günlər sosial şəbəkələrdə vətəndaşlar qatarla səfər zamanı üzləşdikləri müxtəlif problemləri işıqlandırırlar.
Sərnişinlərdən biri Şəki rayonundan Bakıya səfəri zamanı qarşılaşdığı problemlə bağlı sosial şəbəkədə paylaşım edib. Onun sözlərinə görə, iyulun 30-da Şəkidən Bakıya qayıdan iki sərnişinin qatarı saat 23:52-də yola düşməli olsa da, qatar saat 02:00-dək gəlməyib.
Sərnişinlər gecə saatlarında 100 manat ödəyərək taksi ilə Bakıya gəlməyə məcbur olublar. O, yaranmış problemlə bağlı Azərbaycan Dəmir Yolları tərəfindən hər hansı açıqlama verilmədiyini bildirərək, qurumun məsuliyyətsiz davrandığını və bundan sonra dəmir yolundan istifadə etməyəcəyini yazıb.
Qeyd edək ki, sərnişinlər Şəkidən Bakıya qatarla səfər üçün ümumilikdə 40 manat ödəyiblər.
Məsələ ilə bağlı Azərbaycan Dəmir Yollarından bildirilib ki, iyulun 30-da Balakən-Bakı qatarı teplovozun işində yaranan problem səbəbindən Qax-Şəki sahəsində dayanıb. Hadisə ilə əlaqədar dərhal əraziyə digər teplovoz göndərilib.
"Bu səbəbdən qatar Şəki stansiyasına gecikmə ilə çatıb. Yaranmış narahatlıqla əlaqədar şikayətini bildirən sərnişinlə əlaqə saxlanılıb, mövcud vəziyyət izah edilib və Şəki-Bakı istiqaməti üzrə aldığı biletlərin tam dəyərinin qaytarılacağı barədə məlumat verilib", - ADY-dən bildirilib.
Mənbə: Cəbhəinfo.аz
