Şəkinin Oxut kəndi ilə Qoxmuq kəndi arasındakı yeni yaşayış massivində fərdi yaşayış evində yanğın baş verib. Hadisə zamanı ev sahibəsi yanıq xəsarətləri alıb.
Yanğın Oxut kənd sakini Surqa Yadigar qızı Hümmətovaya məxsus kürsülü, birmərtəbəli, 4 otaqlı evdə qeydə alınıb.
Yanğın nəticəsində evin dam örtüyü və mətbəxin yanar konstruksiyaları yararsız hala düşüb. Evin digər hissələri və ətraf ərazi yanğından mühafizə olunub.
Hadisə yerinə Şəki rayon Dövlət Yanğından Mühafizə Hissəsinin texnikası və şəxsi heyəti cəlb edilib.
Yanğın zamanı Surqa Hümmətova hər iki yuxarı ətrafının əl, sinə və üz nahiyələrindən yanıq xəsarətləri alıb. Ona hadisə yerində ilkin yardım göstərilib.
Faktla bağlı araşdırma aparılır.
Mənbə: Lent.аz
