Ağdaşda tir tüfəngi ilə açılan atəş nəticəsində yaralanan 51 yaşlı qadının vəziyyəti ilə bağlı yeni məlumatlar açıqlanıb.
Məlumata görə, 1975-ci il təvəllüdlü qadın sentyabrın 17-də qarın nahiyəsindən aldığı xəsarətlə Şirvan Şəhər Mərkəzi Xəstəxanasına yerləşdirilib.
Qadına qarın divarının açıq yarası diaqnozu qoyulub və əməliyyat olunub. Bir neçə gün müalicə aldıqdan sonra sentyabrın 21-də ambulator müalicə üçün evə buraxılıb.
Hadisədə şübhəli bilinən 14 yaşlı M.Ə. polis tərəfindən dindirildikdən sonra evə buraxılıb. İlkin ifadəsinə görə, yeniyetmə küçə heyvanına tir tüfəngi ilə atəş açmaq istəyib, lakin güllə səhvən qonşuluqda yaşayan qadına dəyib.
Hadisə ilə bağlı araşdırma davam edir. Tir tüfəngi polis tərəfindən götürülüb və onun kimə məxsus olduğu müəyyənləşdirilir.
Məlumata görə, ilkin araşdırmada tüfəngin Ağdaşın tanınmış sahibkarlarından Məhəmməd Əliyevə aid olduğu bildirilir. M.Ə.-nin sahibkarın nəvəsi olduğu qeyd olunur.
Yeniyetmənin atası Cavad Əliyev isə hadisə ilə bağlı sualları cavablandırmayıb.
Mənbə: Teleqraf.аz
