Bu gün Azərbaycanın xalq artisti, tanınmış xanəndə və muğam ifaçısı Mələkxanım Yadigar qızı Eyubovanın doğum günüdür. O, 5 noyabr 1962-ci ildə Şamaxı şəhərində anadan olub.
Mələkxanım Eyubova 1969–1979-cu illərdə Bakıda yerləşən 155 saylı orta məktəbdə təhsil alıb. Eyni zamanda qarmon ixtisası üzrə beşillik musiqi məktəbini bitirib. Erkən yaşlarından musiqiyə maraq göstərən Mələkxanım, bəstəkar Əfrasiyab Cavanşirovun rəhbərlik etdiyi uşaq xorunun solisti olub.
1979–1984-cü illərdə Azərbaycan Dövlət İncəsənət Universitetinin “Musiqili komediya aktyorluğu” fakültəsində təhsil alıb. O, 1980–1985-ci illərdə “İrs” folklor ansamblının, daha sonra isə Azərbaycan Dövlət Televiziya və Radio Verilişləri Şirkətinin nəzdində fəaliyyət göstərən Səid Rüstəmov adına Xalq Çalğı Alətləri Orkestrinin solisti kimi fəaliyyət göstərib. Bununla yanaşı, C. Qaryağdıoğlu adına muğam üçlüyündə çıxış edib.
Xanəndə dünyanın bir çox ölkələrində – ABŞ, Almaniya, Fransa, Türkiyə, Avstraliya, Rumıniya, Belçika, Rusiya və digər ölkələrdə konsert proqramları ilə çıxış edib. 1995-ci ildə Azərbaycan Dövlət Opera və Balet Teatrında Üzeyir Hacıbəylinin “Leyli və Məcnun” operasında Leyli obrazını ifa edib.
Mələkxanım Eyubova artıq 10 ildən çoxdur ki, Azərbaycan Dövlət Mədəniyyət və İncəsənət Universitetində muğam ixtisası üzrə professor kimi fəaliyyət göstərir. Onun sənətdəki xidmətləri yüksək qiymətləndirilib — 1998-ci ildə “Əməkdar artist”, 2002-ci ildə isə “Xalq artisti” fəxri adlarına layiq görülüb.
Sənətkarın Almaniya, Fransa və Türkiyədə muğam albomları buraxılıb. O, Heydər Əliyev Fondunun mükafatçısıdır, 2016-cı ildə Cəfər Cabbarlı mükafatı, 2017-ci ildə isə Prezident Mükafatı ilə təltif edilib.
3 dekabr 2023-cü ildə Azərbaycan Dövlət Mədəniyyət və İncəsənət Universitetinin 100 illiyi münasibətilə Prezidentin fəxri diplomu ilə təltif olunub.
Shimal.News redaksiyası xalq artisti Mələkxanım Eyubovanı doğum günü münasibətilə təbrik edir, sənətkarımıza möhkəm can sağlığı və yaradıcılıq uğurları arzulayır.
