Bu gün şəhid Kərəm Veyisovun ad günüdür.
1998-ci ildə Xaçmazda doğulan Kərəm iyul döyüşlərindən sonra cəbhəyə könüllü yazılıb.
Vətən müharibəsinin ilk günlərindən cəbhəyə yollanan qəhrəman çavuş manqa komandiri kimi döyüşlərə atılıb. Füzuli uğrunda gedən ağır savaşda yaralanıb və bir həftə sonra yenidən döyüşlərə qatılıb. Cəbrayıl, Füzuli, Zəngilan və Qubadlının işğaldan azad olunmasında fəal iştirak edib.
Döyüş yoldaşları Kərəmi "Canavar" deyə çağırırdı. Dediklərinə görə, o, düşməni yalın əlləriylə boğaraq məhv edirdi.
Kikboksinq üzrə üçqat dünya çempionu Kərəm Veyisov noyabrın 7-də Şuşa döyüşləri zamanı qəhrəmancasına şəhid olub.
O, ölümündən sonra "Vətən uğrunda", "Şuşanın azad olunmasına görə", "Döyüşdə fərqlənməyə görə", "İgidliyə görə" və "Füzulinin azad olunmasına görə" medalları ilə təltif edilib.
