Mal qara arasında yayılan dabaq xəstəliyi süd məhsullarının satışına təsir edib.
Milli.az-ın məlumatına görə, vətəndaşlar əsasən kəndlərdən satılan emal olunmayan südü almağa ehtiyat edirlər.
Kənd südü hələ də təhlükəlidir?
Satıcıların sözlərinə görə, südün qiymətində nə artım, nə də azalma var. Alıcılar da bir müddətdir ki, kənd südü almadıqlarını deyirlər.
Məsələ ilə bağlı qida mütəxəssisi Mütəllim Abdullazadə qeyd edir ki, əsl təhlükə kənd südündə yox, onların nəzarətsiz şəkildə saxlanılması, gigiyenik normalara əməl olunmaması, qaynadılmadan istehlak olunması ilə bağlıdır:
"Xəstə heyvandan alınan çiy südün birbaşa içilməsi risk yarada bilər. Amma süd düzgün şəkildə qaynadıldıqda xəstəlik törədicilər istilik nəticəsində məhv olur. Yaxşı qaynadılan süd dabaq və ya digər xəstəliklər baxımından təhlükəli hesab edilmir".
Qeyd edək ki, hazırda dabaq xəstəliyinə qarşı heyvanlar arasında peyvəndləmə aparılır.
