2022-ci il 12-14 sentyabr tarixində Ermənistanın silahlı qüvvələri tərəfindən növbəti genişmiqyaslı təxribat törәdilib. 44 günlük müharibədəki acı məğlubiyyəti həzm edə bilməyən erməni siyasi rəhbərliyi 9 noyabr sazişindən sonra dəfələrlə eyni əməli törədib. Bununla onlar növbəti dəfə revanşist niyyətlərindən hələ də kənarlaşa bilmədiklərini sübuta yetirirdilər.
Amma hər dəfə olduğu kimi qətiyyətli Azərbaycan Ordusu düşmənin təxribatına dərhal cavab verdi və qarşı tərəfi xeyli itki verərək geri çəkilməyə məcbur etdi.
Shimal.News xəbər verir ki, hərbi əməliyyatlar nəticəsində Azərbaycan Silahlı Qüvvələrinin ümumilikdə 80 hərbi qulluqçusu şəhidlik zirvəsinə ucalıb.
Təxribatın qarşısını alan zaman şəhid olanlar arasında Şimal bölgəsinin hərbçiləri də olub:
Xaçmazın, Əbilyataq kənd sakini, 1989-cu il təvəllüdlü baş gizir Elnur Rüstəmov. Vətən müharibəsində qəhrəmancasına döyüşüb, göstərdiyi sücaətə görə “Füzulinin azad olunmasına görə”, “Zəngilanın azad olunmasına görə”, “Kələbəcərin azad olunmasına görə” və “Cəsur döyüşçü” medalları ilə təltif edilib. Ailəli olub və 3 övladı var.
Qubanın İsnovqışlaq kənd sakini, 2001-ci il il təvəllüdlü müddətdən artıq xidmət edən (MAXE) Ümid Həsənov. Şəhidimiz ailənin tək oğlu idi. O, subay olub, iki bacısı isə ailəlidir.
Xızının Giləzi qəsəbə sakini, 1990-cı il təvəllüdlü kapitan Saleh Qurbanov. Vətən müharibəsi zamanı Cəbrayıl, Xocavənd və Laçın istiqamətlərində gedən döyüşlərdə iştirak edib. Azərbaycan Prezidenti İlham Əliyevin Sərəncamlarına əsasən, qəhrəmanlığına görə müxtəlif medallarla ilə təltif edilib.
İsmayıllının Talıstan kənd sakini, 1996-cı il təvəllüdlü baş leytenant Cavidan Bədəlov. O, Vətən müharibəsi zamanı Murovdağ istiqamətində gedən döyüşlərdə savaşıb və “Azərbaycan Bayrağı” ordeninə layiq görülüb.
Şabrandan olan, 2000-ci il təvəllüdlü leytenant Murad Rəsulov. O, 2017-ci ildə yüksək balla Heydər Əliyev adına Azərbaycan Ali Hərbi Məktəbinə qəbul olunub. Sonra kursant kimi Vətən Müharibəsində döyüşüb. Genişmiqyaslı təxribat zamanı isə igidlik və mərdlik göstərib, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olub.
Şəhid olan hərbi qulluqçularımızın ailələrinə və yaxınlarına dərin hüznlə başsağlığı verir, yaralılarımıza Allahdan şəfa diləyirik.
