Azərbaycan lirik poeziyasının böyük nümayəndəsi, "şairlər xaqanı" Xaqani Şirvaninin yaradıcılığında Şabran qalası xüsusi tarixi və mənəvi məna daşıyır. Alimlərin fikrincə, şairin burada həbsdə olduğu dövrdə qələmə aldığı zindan şeirləri Azərbaycan və ümumilikdə Şərq poeziyasında yeni bir mərhələnin əsasını qoyub.
AZƏRTAC-ın məlumatına görə, AMEA-nın Məhəmməd Füzuli adına Əlyazmalar İnstitutunun baş mühafizi, filologiya elmləri doktoru Səbinə Əhmədovanın təqdim etdiyi "Şairlər xaqanı Xaqani" məqaləsində qeyd olunur ki, Şabran qalasında yazılan şeirlərdə azadlıq, insan ləyaqəti və ədalət ideyaları xüsusi güclə ifadə olunub.
Tədqiqatçılar bu əsərləri Xaqaninin fəlsəfi dünyagörüşünün və milli poetik düşüncəsinin zirvəsi kimi dəyərləndirirlər. Şabran qalası bu mənada təkcə tarixi məkan deyil, həm də Azərbaycan poeziyasının yaddaşında silinməz iz buraxan mənəvi məkandır.
