Azərbaycan kinosunun yaddaşında elə simalar var ki, onlar bir obrazla belə tamaşaçının qəlbində silinməz iz buraxıblar. Əkbər Fərzəliyev də həmin sənətkarlardandır. Tamaşaçı onu ən çox "Qızmar günəş altında" filmində yaratdığı Aydın obrazı ilə xatırlayır.
Shimal.News məlumat verir ki, kino tarixinin səssiz, lakin unudulmayan simalarından olan Əkbər Fərzəliyevin 1932-ci il oktyabrın 1-də Köhnə Xudat kəndində dünyaya gəlib. Sənətkarın taleyi də həyat yolu kimi qeyri-adi olub. O, əvvəlcə indiki Azərbaycan Dövlət Pedaqoji Universitetində təhsil alsa da, atasının istəyi ilə təhsilini yarımçıq qoyaraq Bakı Dövlət Universitetinin hüquq fakültəsinə daxil olub.
Onun sənət yolu isə təsadüfən başlayıb. Tələbə illərində Bəxtiyar filminin kütləvi səhnələrinə dəvət olunması həyatını dəyişib. Ardınca "O olmasın, bu olsun", "Ögey ana", "Koroğlu" və digər ekran işlərində rol alıb.
Əkbər Fərzəliyevin kino tarixində xüsusi yer tutmasının əsas səbəbi isə "Qızmar günəş altında" filmində yaratdığı gənc həkim Aydının obrazı oldu. Romantik, vicdanlı və insanlara bağlı bir ziyalı obraz həmin dövr tamaşaçısının ideal qəhrəmanına çevrilmişdi.
Maraqlıdır ki, aktyor xarici görünüşünə görə əfsanəvi qəhrəman Mehdi Hüseynzadəyə çox bənzədilirdi və bir vaxtlar "Uzaq sahillərdə" filmində Mixaylo roluna əsas namizədlərdən biri hesab olunurdu.
1960-cı illərdən sonra isə o, kino mühitindən uzaqlaşaraq doğma Qusar rayonuna qayıdıb. Burada Ləzgi Xalq Teatrını yaradıb, mədəniyyət evinə rəhbərlik edib, tamaşalara quruluş verib və paralel olaraq hüquqşünas kimi çalışıb.
Əkbər Fərzəliyev həm də şair idi. Onun "İntizar", "Qusarım", "Gəl barışaq" kimi şeirləri uzun illər dillər əzbəri olub. "İntizar" şeirinə isə Ruhəngiz Qasımova tərəfindən mahnı bəstələnib.
1999-cu il mayın 15-də vəfat edən sənətkar nə fəxri ad aldı, nə də böyük təntənəli tədbirlərlə xatırlandı. Amma onun ən böyük mükafatı tamaşaçı sevgisi oldu.
FİLMOQRAFİYA:
1. Bəxtiyar (II) (1955, tammetrajlı bədii film) – aktyor
https://www.youtube.com/watch?v=_vxgMXuHnwc
2. O olmasın, bu olsun (1956, tammetrajlı bədii film) – aktyor (ziyalı)
https://www.youtube.com/watch?v=mZTbGUGk7Rc
3. Qızmar günəş altında (1957, tammetrajlı bədii film) – aktyor (Aydın)
https://www.youtube.com/watch?v=qnILHJ2NsPY
4. Ögey ana (1958, tammetrajlı bədii film) – aktyor (usta Əbdül)
https://www.youtube.com/watch?v=Js9RX9k5VnI
5. Əsl dost (1959, tammetrajlı bədii film) – aktyor
https://www.youtube.com/watch?v=Mctfb_hvsGE
6. Koroğlu (1960, tammetrajlı bədii film) – aktyor (Eyvaz)
https://www.youtube.com/watch?v=wuRVEu9TvrA
7. Mollanın sərgüzəşti (1960, qısametrajlı bədii film) – aktyor (gənc aqronom)
https://www.youtube.com/watch?v=sPzfrjZq3JU
8. Bizim küçə (1961, tammetrajlı bədii film) – aktyor (boks üzrə məşqçi)
