Qusar rayonunun Əniğ (Əniq) kəndində, Qusarçayın sağ sahilində IX-XIV əsrlərə aid qala var.
Shimal.News məlumat verir ki, 1960-ci illərdə Əniq (Enıq) qalasında aşkar edilən qab qalıqları, silahlar və gümüş əşyalar həmin dövrə aiddir.
Salavat dağ keçidini nəzarət altında saxlayan Əniq qalası dəniz səviyyəsindən 1100 m hündürlükdə, təpə üzərində yerləşir. O, bir tərəfdən sürətli axan çay suları və qayaları ilə, digər tərəfdən isə dağlarla əhatə olunduğuna görə strateji cəhətdən əhəmiyyətli idi.
Yerli əfsanəyə görə, Enıx adlı hökmdarın şərəfinə qalaya bu ad verilib. Əniq qalasının içində yaşayış məntəqəsi olub. Onun adı haqqında məlumat yoxdur, lakin ərəb müəlliflərinin qeyd etdiyi Abhaz şəhəri bu qalanın yerləşdiyi əraziyə ən çox uyğun gəlir.
XIV əsrin gürcü "Xronoqraf”ının məlumatına əsasən 1288-ci ildə Monqol hökmdarı Arqun xanın yürüşü zamanı Anik adlı qala dağıdılıb. Ehtimal olunur ki, bu, Əniq qalası idi. Bir müddət sonra ətraf ərazilərdən gələn sakinlər burada məskunlaşaraq kənd qurublar. Kənd tikiləndə qala divarlarının bir hissəsi dağıdılaraq daşlarından tikinti materialları kimi istifadə olunub.
Qalanın 2 hissəsi bu günə kimi qalıb - 15-16 metr uzunluğunda divar və darvaza. Onlar ölkə əhəmiyyətli tarix və mədəniyyət abidəsi kimi qorunur.
Mənbələr:
