Bu gün şəhid Şair Heydərovun dünyaya göz açdığı gündür.
Shimal.News xəbər verir ki, Şair Heydərov 4 sentyabr 1998-ci ildə Qusar rayonunun Mucuq kəndində dünyaya gəlib.
O, bir müddət Azərbaycan Silahlı Qüvvələrinin sıralarında, "N" saylı hərbi hissələrdən birində hərbi xidmət qulluqçusu olub. Hərbi xidmət müddəti tamam olduqdan sonra yenidən müddətdən artıq həqiqi hərbi xidmət qulluqçusu olaraq xidmətinə davam edib.
Ş.Heydərov 23 mart 2022-ci ildən 31 may 2022-ci ilə qədər “Komando” Dağ Təlim Mərkəzində keçirilən 5-ci qəbul “Komando başlanğıc kursu”nu bitirib və “Komando başlanğıc döş nişanı”na layiq görülüb. Həmin tarixdən Quru Qoşunlarının tərkibindəki Komando Briqadasında kəşfiyyatçı kimi xidmətini davam etdirib.
Şair Heydərov 13 sentyabr 2022-ci ildə döyüş tapşırığının yerinə yetirilməsi zamanı şəhid olub. O, ölümündən sonra 3-cü dərəcəli "Rəşadət" ordeni və "Vətən uğrunda" medalı ilə təltif edilib.
